Опубликовано:
XXX Yay Olimpiya Oyunlarında akademik avarçəkmə yarışlarında daha bir növdə medal sahibini tapıb. Apasport.az saytının məlumatına görə, 1 nəfərlik qayıqla (M1X) 2000 m məsafəyə yürüşün qalibləri müəyyənləşib.
Final mərhələsində Azərbaycan milli komandasına ikinci medalı qazandıracağı gözlənilən Aleksandr Aleksandrov da mübarizə aparıb. İdmançımız 2-ci yürüş zolağında gücünü yoxlayıb.
22 yaşlı təmsilçimizin rəqibləri Lassi Karonen (İsveç), Ondrej Sinek (Çexiya), Mahe Dirsdal (Yeni Zelandiya), Alan Kampbell (Böyük Britaniya) və Marsel Haker (Almaniya) olub. Təəssüf ki, Aleksandrovun həlledici mərhələdə çıxışı ürəkaçan olmayıb. O, finiş xəttinə 5-ci çatıb. Bu isə hələlik Azərbaycan Olimpiya yığmasının heyətində ikinci göstəricinin təkrarıdır. Ondan öncə ağırlıqqaldıranımız Boyanka Kostova (58 kq) da 5-ci olmuşdu.
Yarışın çempionu Yeni Zelandiya təmsilçisi olub. İkinci yer Çexiyalı, üçüncü pillə isə böyük britaniyalı avarçəkənə qismət olub.
Qeyd edək ki, Londona 53 idmançı ilə yollanan millimizin heyətində hələlik ağırlıqqaldıranımız Valentin Xristov (56 kq) bürünc medal qazanıb.
